Minsan sa kabila ng tawanan at biruan natin sa buhay, may mga oras na nais kong maging seryoso at huminto sandali upang bigyang daan ang mga gusto kong sabihin at saloobin.Drama mode ito anak.
Hindi natin tiyak kung hanggang saan at kung hanggang kailan ang buhay ng tao, mamaya ,bukas o makalawa lahat ng bagay pwede magbago o mawala. Kaya naisipan kong gumawa ng munting liham para sa'yo anak. Kung sakali mang hindi mo ito mabasa ng personal, sana ay may mga taong magsabi sa'yo ng nilalaman nito.Masyado ka pang bata para sa ganitong bagay pero gusto ko pa ring gawin sapagkat hindi natin hawak ang panahon.
Dear Anak, una sa lahat , alam kong hindi pwedeng ipag utos ang respeto. Walang magulang na perpekto. Kung may mga bagay man na sa tingin mo mali sa ginagawa namin, gusto kong sabihin mo sa' kin mismo, hindi sa ibang tao. huwag mong iisipin kahit kailan na hindi ko kayang tanggapin ang mga pagkakamali ko. Matapang, masungit man ako pagkaminsan, but i understand, more than you think i can at handa akong magbaba ng lebel para mag pantay tayo bilang mag kaibigan. Huwag mo ding intindihin ang pagitan ng edad natin, Higit kanino mas alam ko kung saan ka hindi mapapahamak.
Kung sa mga panahon na wala ako, humingi ka ng tulong sa mga lolo't lola mo, tito at tita mo, handa silang umarkila ng tangke pag nalaman na inaapi ka, maniwla ka.
Gusto kong igalang mo ang mga magulang namin ng tatay mo, nagkaroon ka ng "awesome childhood" dahil sa kanila,pati na rin ang mga tito at tita mo. Nanjan lang palagi sila para sa atin, magpasalamat tayo. Tulad ko ,mahal ka nila ng walang hinahanap na kapalit kundi konting lambing mula sa'yo. Maswerte ka anak, sana marealize mo yun pag laki mo. Hindi tyo mayaman, sapat ng kumakain tayo sa oras, gayun pa man, napaka swerte mo. Marami kang dapat ipagpasalamat, gusto kong makita mo ang mundo na maraming blessings at hindi puno ng problema.
Gusto kong magkaroon ka ng trabaho na talagang gusto mo, Huwag mong papasukin ang pintuan na alam mong hindi ka masaya. parang pag susuot yan ng sapatos na hindi kasya. Hindi ka makaka arangkada. Wala kang mararating. Kung hindi para sa'yo, matuto kang maghintay.Magiging sulit ang lahat, maiintindihan mo.
Hindi ko kayang idilkta kung anong klaseng tao ang magiging ikaw pag dating nag panahon. Pero alam kong isa AKO sa makakaapekto ng malaki sa pag buo mo nito. Anak, hindi ako matalino,pero naniniwala akong kaya sa'akin ka ibinigay ng Lord dahil alam nyang kaya kong maging Ina, at tutuparin ko yun hindi sa paraang napipilitan lang, kundi dahil masaya din akong magkaroon ng anak.
Huwag na huwag mong ipagpapalit ang prinsipyo sa pera. Kung may mga tuksong lumapit sa'yo pra kumita ng malaki sa maling paraan, wag mag atubiling tumanggi. Tandaan mong PANGALAN lang ang pagmamay ari mo sa mundo, wag mong dudumihan. Mas mataas ang presyo ng pagkatao mo kaysa sa kahit anong materyal na bagay. Lumagay ka sa legal.
Ang pag aasawa ay seryosong bagay, alam kong malaki ang magiging kaibahan ng henerasyon mo sa henerasyon ko pero ikatutuwa ko kung maniniwala ka pa rin sa KASAL. Kahit lahat ng kaibigan mo makipag Live-in, huwag kang gumaya sa uso. Hindi ako tututol sa kahit na sinong babaeng naisin mo, tiwala naman ako sa taste mo! (nescafe yan ha)
kung magiging abala ka pag dating araw sa trabaho mo at personal na buhay, wag kang mag alala anak ko, hindi ako magtatampo kung hindi mo man ako madalaw, mas mag aalala ako kung pababayaan mo ang sarili mo kapalit ng sweldo.
Hanggang dito na lang anak ko.. bata pa ako at inaamin kong kapos pa ang kaalaman ko para i-share sayo.
LOVE ,
Mama
